У Оршы да 9 траўня ўпершыню з'явяцца 3D-канструкцыі

Зусім мала часу застаецца да свяшчэннай даты – 80-годдзя Вялікай Перамогі.

На Аршаншчыне актыўна ідзе падрыхтоўка да яе святкавання. Прыводзяць у парадак воінскія пахаванні, мемарыяльныя комплексы, месцы баявой і воінскай славы. Спецыялісты па зялёным будаўніцтве Аршанскай спецавтобазы хутка атрымаюць першую партыю рассады кветак, якімі ў першую чаргу ўпрыгожаць клумбы каля памятных месцаў. Пераменіцца і сам горад.

Журналістка «Аршанскай газеты» паглядзела, якія незвычайныя аб'екты з'явяцца ў Оршы напярэдадні свята.

Як расказала першы намеснік дырэктара Аршанскага Цэнтра падтрымкі прадпрымальніцтва і нерухомасці Людміла Шынгірэй, па ініцыятыве Аршанскага раённага выканаўчага камітэта на прадпрыемстве вырабілі арыгінальныя малыя архітэктурныя формы. Сямнаццаць аб'ёмных канструкцый у хуткім часе з'явяцца на вуліцах Оршы і раёна.

Адзіннаццаць малых архітэктурных форм прысвечаны ўраджэнцам Аршаншчыны – Героям Савецкага Саюза. Іх памер – 3,5х2,5 м. На іх намаляваны фотаздымкі з імёнамі герояў і надпісам «Беларусь памятае 1941-1945». Яшчэ пяць архітэктурна-дэкаратыўных элементаў выкананы ў форме зоркі памерам 2,8х2,5 м. А яшчэ адна маштабная аб'ёмная канструкцыя стане сюрпрызам для гараджан.

У вырабе архітэктурных форм выкарыстаны алюмініевая кампазітная панэль, металічная канструкцыя і банэрны матэрыял. Ужо хутка аршанцы і госці горада змогуць іх убачыць на вуліцах рэгіёна.

Альга ТИХОНОВА.
Фота аўтара.

orshanka.by