Абноўлены музей «Слава настаўніку. Зала памяці Уладзіміра Караткевіча» адчыніўся ў СШ № 3 г. Оршы
Абноўлены музей «Слава настаўніку. Зала памяці Уладзіміра Караткевіча» адкрыўся сёння ў сярэдняй школе № 3, якая носіць імя нашага знакамітага земляка.
Музей пераехаў у прасторнае памяшканне з сучасным рамонтам. Экспазіцыя падзелена на некалькі тэматычных частак і насычана багатым фотаматэрыялам. Расказваецца аб усіх перыядах жыцця і творчасці Уладзіміра Семёнавіча, аб стварэнні школьнага музея і яго першым дырэктару ў 1984-2000 гадах Ліліі Радомскай, аб гісторыі адукацыі на Оршаншчыне, паказана летапіс школы.
Абноўлены музей пашырыўся ваеннай тэматыкай. Расказваецца аб настаўніках – удзельніках Вялікай Айчыннай вайны, якія засталіся вернымі прафесіі і працягнулі свой педагагічны шлях пасля ваенных ліхалеццяў, і тых, хто не дажыў да мірных дзён, змагаючыся на франтах.
Да адкрыцця музея школьнікі падрыхтавалі канцэртную праграму па старонках жыцця і творчасці Уладзіміра Караткевіча. А затым запрасілі на інтэрактыўныя пляцоўкі-майстар-класы па творах пісьменніка.
У якасці ганаровых гасцей у мерапрыемстве прынялі ўдзел намеснік старшыні Оршанскага райвыканкама Анастасія Прокофьева, начальнік упраўлення па адукацыі Оршанскага райвыканкама Таццяна Янкоўская, начальнік аддзела ідэалагічнай працы і па справах моладзі Оршанскага райвыканкама Марыя Шматова, ваенны камісар Оршанскага і Дубровенскага раёнаў Іван Чэрткоў, ветэраны педагагічнай працы.
Па словах педагогаў, музей стаў цэнтрам культурнай, адпачынкавай і школьнай навуковай дзейнасці, дзе дзеці пішуць даследчыя працы, рыхтуюць праекты, камунікуюць у гуртку па інтарэсах. А ў абноўленым фармаце займацца стала яшчэ зручней.
– Наш музей з'яўляецца цэнтрам грамадзянска-патрыятычнага выхавання, які спрыяе выхаванню ў кожнага школьніка любові і павагі да сваёй краіны, якая пачынаецца з любові і павагі да малой радзімы, горада, школы, выхаванню бережнага стаўлення да гісторыі свайго народа. Акрамя таго, школьны музей – гэта выхаваўчы цэнтр адкрытага адукацыйнага прасторы, каардынатар дзейнасці грамадзянска-патрыятычнага выхавання ўстановы адукацыі, звязваючая нітка з іншымі ўстановамі культуры, грамадскімі арганізацыямі, – кажа кіраўнік музея, настаўніца беларускай мовы і літаратуры СШ № 3 ім. В. С. Караткевіча Наталля Пруднікава.
Экскурсію ў музеі традыцыйна праводзяць школьнікі. У кожнай апавядальнай частцы свой экскурсавод у вобразе героя экспазіцыі. Таму падчас экскурсіі ў школьным музеі можна сустрэць і юнага Уладзіміра Караткевіча, і яго сябра фотажурналіста Валянціна Ждановіча, і оршанца Сашу Котава – юнага героя Вялікай Айчыннай вайны, якому таксама прысвечана частка экспазіцыі.
Сяргей СЛЕПЦОВ.
www.orshanka.by