Дзень Перамогі ў Оршы пачаўся з урачыстага мітынгу

Святочны дзень 9 Мая ў Оршы пачаўся каля Помніка воінам-асвободчыкам горада, дзе адбыўся ўрачысты мітынг, прысвечаны 80-годдзю Перамогі савецкага народа ў Вялікай Айчыннай вайне.

Тысячы оршанцаў сабраліся каля абеліска, каб ушанаваць памяць тых, хто абараняў нашу Радзіму. Урачыстае мерапрыемства пачалося з агульнанацыянальнай хвіліны маўчання ў памяць пра подзвіг нашага народа ў барацьбе з нямецка-фашысцкімі захопнікамі.

Час перакручвае старонкі гісторыі, яны сыходзяць усё далей і далей. Але ў сэрцах людзей жыве памяць пра тую страшную, суровую і вялікую вайну.

З віншавальнымі словамі да ўсіх жыхароў і гасцей горада звярнуўся старшыня Оршанскага райвыканкама Ігар Мароз. У сваім выступленні ён адзначыў, што Оршаншчына памятае тых, хто да апошняга патрона стрымліваў ворага на мяжы каля Брэсцкай крэпасці, пад Мінскам і Магілёвам, хто быў замучаны ў застэнках гестапа, хто згарэў у Хатыні і Трастянцы. Усе, чыёй крывёй прасякнута кожная пядзь нашай беларускай зямлі.

Оршаншчына – зямля вядомых партызан і падпольшчыкаў. Зямля, якая з першых дзён вайны аказалася ў зоне баявых дзеянняў. Зямля, на якой прагучалі першыя залпы легендарнай «катюшы» і дзейнічаў знакаміты партызанскі атрад пад камандаваннем Канстанціна Заслонова. Зямля, якая адной з першых уступіла ў беларускую стратэгічную наступальную аперацыю «Багратон» і перамагла, перамагла дзякуючы згуртаванасці народа і самаадданасці нашых зямлякоў.

Творчыя нумары выканалі народны гарадскі аматарскі тэатр, школа танца «Ві-за-ві Кідс» і ўзоравы ансамбль танца «Ві-за-ві».

У знак памяці загінулым у Вялікай Айчыннай вайне, ветэранам вайны, якія не дажылі да 80-годдзя Вялікай Перамогі, старшыня Оршанскага райвыканкама Ігар Мароз і старшыня Оршанскага раённага Савета дэпутатаў Інна Хомутоўская ў суправаджэнні прадстаўнікоў Узброеных Сіл Рэспублікі Беларусь пад агнявы залп усклалі вянок да Помніка.

Віктар СОСНОЎСКІ, Сяргей СЛЕПЦОВ.
Фота Сяргея СЛЕПЦОВА.

orshanka.by