Аграры Віцебскай вобласці намалатілі мільён тон зерня

Віцебская вобласць пераадолела намалот у 1 млн тон зернавых і зернабобавых з улікам рапсу. Сімвалічны сноп, які сімвалізуе дасягненне пастаўленай на гэты сельскагаспадарчы год мэты, уручылі 9 верасня старшыні Віцебскага аблвыканкама Аляксандру Суботыну на адным з палёў у Віцебскім раёне, перадае карэспандэнт sb.by.

Взяты рубеж даказвае, што разам можна шмат чаго дасягнуць і ў рэгіёна яшчэ ёсць рэзервы, падкрэсліў на святочнай цырымоніі Аляксандр Суботын:

— Камандны дух і тэхналогіі дапамаглі даць адсечку любым пагодным умовам. Людзі былі зараджаны на вынік. У гэтым годзе мы вельмі гнутка папрацавалі з тэхнікай. Дзейнічалі максімальна сінхранізавана: арыентаваліся па надвор'і, перакідваючы машыны туды, дзе няма дажджу, каб як мага эфектыўней іх выкарыстоўваць. Плюс, канешне, — вялікі дзякуй усёй краіне! — дапамаглі камбайнамі Магілёўская, Мінская, Гродзенская, нават Гомельская вобласці. Гэта дазволіла нам наблізіць вынік і ў больш сціслыя тэрміны ўзяць тое зерне, той хлеб, які быў на палях. Вось такімі сумеснымі намаганнямі мы сабралі наш мільён. Уборка ў рэгіёне практычна на фінішы, поўнасцю плануецца завяршыць яе ў бліжэйшыя дні.

У разрэзе рэгіёнаў вобласці традыцыйна высокі вынік па намалоту нароўні з Аршанскім прадэманстраваў Віцебскі раён. На рахунку кожнага больш за 100 тысяч тон зерня. Няпросты, але паспяховы — так характарызуе бягучы сезон старшыня Віцебскага райвыканкама Сяргей Егараў:

— Нягледзячы на традыцыйныя складанасці з надвор'ем, раён узяў планку ў 100 тысяч тон зернавых і зернабобавых. У гэтыя дні дадаем апошнія тоны па дзяржаўным заказе. Пры гэтым дзяржаўны заказ па рапсу выканалі на 100 працэнтаў. Зараз актыўна вядзём сяўбу азімых зернавых. Паралельна ўбіраем салому з палёў, працягваем загатоўку кармоў. Два гаспадаркі ўжо прыступілі да ўборкі кукурузы на сілас. Стаўку ў працы пад ураджай будучага года па-ранейшаму будзем рабіць на азімыя зернавыя (іх плошча павялічыцца на 1,5 тысячы гектараў) і строгае выкананне тэхналагічных рэгламентаў. Больш тонкія наладкі закрануць схемы прымянення сродкаў абароны раслін ад шкоднікаў і пустазелля.

Як патлумачыў дырэктар Віцебскага зональнага інстытута сельскай гаспадаркі Сяргей Калоткаў, шчодрыя ападкі ў пачатку лета, колькасць якіх у чатыры разы перавысіла норму, стварылі аптымальныя ўмовы для распаўсюджвання шкоднікаў і хвароб раслін, што патрабавала ад аграрыяў і навукоўцаў умацавання пазіцый менавіта ў гэтым напрамку:

— Каб абараніць і захаваць ураджай, прыйшлося пастарацца. Больш і больш дакладна папрацавалі з гербіцыдамі, фунгіцыдамі, апрабавалі новыя прэпараты. Механізатары выхоплівалі літаральна кожную пагожую гадзіну, каб апрацаваць палі. Вынік, як бачыце, таго варты. Напрыклад, на нашых палях валавы збор ураджаю ўжо дасягнуў больш за 2 тысячы тон зернавых культур і 600 тон масласемян рапсу.